Fáar streingir at spæla uppá

– Hópurin sær spennandi út, men hann er sera smalur.

Tað sigur hondbóltssnillingurin í Kollafirði, Hans Eli Sigurbjørnsson, um besta liðið hjá KÍF, nú nýggja kappingarárið byrjar um vikuskiftið.

KÍF má nevniliga klára seg uttan Fríða Weyhe, sum er fluttur til Damarkar, Rúna Joensen, ið er farin til Íslands, Magnus Müller, sum er farin aftur til barndómsfelagið VÍF, og Jaspur Joensen og Rógva Weihe, sum báðir hava sett hondbóltsskógvarnar á hillina.

Fráfallið hevur verið stórt,  men nakað av tilgongd hevur eisini verið. Millum annað hava kollfirðingar fingið ein høgrabakk úr Montenegro.

– Borko hevur ótrúliga góð skot. Tað gongur væl til venjing, so tað verður spennandi at síggja, hvussu tað fer at hilnast hjá honum í dystum, sigur lítillátni liðskiparin.

Niklas Reginsson, sum er fluttur aftur til Føroya eftir lokan lestur, er eisini farin aftur í reyðu blusuna, og KÍF hevur eisini fingið tilgongd av Joakim Jürs, ið var málverji hjá STÍF í fjør, og einum ungum spælara úr H71 og einum úr Neistanum.

Tað gekk óvanliga illa hjá KÍF í fjør, sum bara fingu skavað 14 stig saman og endaðu á einum aftasta plássi.

Hetta skal broytast.

– Tað eru fleiri lið, sum uttan iva eru sterkari enn vit, men vit ætla so at gera okkara til at geva øllum harða mótstøðu. Málið er at gera tað betri enn í fjør, sigur Hans Eli Sigurbjørnsson.

Fyrsti dystur hjá KÍF kappingarárið 2018/19 er móti Neistanum leygardagin klokkan 18.00 í Høllini á Hálsi .

HSF longt við U04-venjarar

23. november 2022

HSF hevur longt sáttmálarnar við verandi venjarar hjá U04-manslandsliðnum, Hjalta Mohr Jacobsen og Djóna Gaard Joensen.

Stjóri settur í HSF

17. november 2022

Hans Jón Thomsen er settur sum stjóri í Hondbóltssambandi Føroya. Talan er um eitt nýtt starv, sum í sambandi við økta virksemi skal styrkja um umsiting og leiðslu í sambandinum.

Leikaramenning 2022-23

15. november 2022

Seinastu tvey vikuskiftini hava 250 gentur og dreingir verið til leikaramenngin hjá HSF. Talan eru um leikarar føddir í 2008, 2009 og 2010. Samlingarnar hava verið í Havn og Klaksvík.