Føroyar taptu fyrsta EM-dystin

U18-landsliðið við monnum tapti í morgun fyri Luksemburg í sínum fyrsta dysti í EM-kappingini í Georgia, sum er farin av bakkastokki í dag. Hetta er eisini fyrsti landsdystur nakrantíð hjá fleiri av føroysku spælarunum. 

Føroyar byrjaðu væl og løgdu seg á odda beinavegin við tveimum málum og lógu á odda til 9-7. Eftir støðuna 11-11 dróg Luksemburg frá. Føroyingarnir brendu opnar møguleikar, men serliga stóð illa til í verjuni, sum mótstøðumenninir runnu um koll. Tá farið var til hálvleiks var støðan 12-18.

Í seinna hálvleiki stóð verjan nakað stinnari, og við 16 ára gamla Eliasi á Skipagøtu sum støðuga hóttan í álopinum, megnaðu Føroyar at halda málmuninum. Endaliga úrslitið varð 26-32.

Elias á Skipagøtu varð valdur til dagsins leikara eftir dystin.

Føroysku U18-leikararnir iðra seg óiva um seinnu hálvu av fyrra hálvleiki. Í morgin hava teir møguleika at rætta ryggin, tá teir skulu spæla móti Estlandi.

Málskjúttar:
Elias á Skipagøtu, 10
Hákun Vest av Teigum, 4
Pauli Mittún, 3
Julian Kragesteen, 3
Martin Danielsen, 2
Dánjal Ragnarsson, 1
Sakaris Aviano Sakarisson, 1
Ivan Mrdalo, 1
Høgni Fríðuson Gaard, 1

 

FM1-avtalan heldur fram

17. september 2019

HSF og FM1 hava longt avtaluna um miðling og útvarping av hondbóltsdystum í lands- og steypakappingini, umframt landsdystum. Hetta er triðja árið HSF og FM1 samstarva um hondbóltsmiðling.

HSF og P/F SMS leingja samstarvið

15. september 2019

Hondbóltssambandið og P/F SMS hava longt samstarvið um bestu mans- og kvinnudeildina í hondbólti, nevndar ávikavist Okkara- og SMS-deildin. Avtalan er galdandi fyri kappingarárið 2019-20.

Væleydnað dómaraskeið

12. september 2019

Seinasta vikuskiftið skipaði HSF fyri A– og B-dómaraskeiðum saman við roynda IHF dómaravegleiðaranum, Jørn Møller Nielsen.