Frá ongum til 27 spælarar

– Tað er sera gleðiligt, at vit aftur síggja nógvar gentur, ið vilja spæla hondbólt við Stjørnuni.

Tað sigur Jastrid Gullaksen, forkvinna í hondbóltsfelagnum Stjørnuni.

Tað sá alt annað enn bjart út við kappingarársbyrjan 2016/17 hjá kvinnufelagnum í Klaksvík. Í august, tá farið varð undir fyrstu venjingarnar hjá G12, var tað eingin genta sum møtti.

– Ja, ein heil høll og ongar gentur. Í G10 vóru bara nakrir heilt fáir spælarar, og í G14 var júst nokk gentur til eitt lið, greiðir forkvinnan frá.

Nevndin í Stjørnuni visti sum var, at okkurt skuldi gerast beinanvegin, um felagið skuldi yvirliva.

– Vit meldaðu tvey lið til landskappingina í G10 og G12, sjálvt um vit ongar gentur høvdu. Eisini varð byrjað aftur við U6 og U8. Vit settu eisini ein góðan høvuðsvenjara, ið venur allar deildirnar í Stjørnuni. Afturat honum fingu vit fleiri føroyskar vaksnar og yngri hjálparvenjarar til ungdómsliðini. Síðan royndu vit at hampa um okkara sosialu miðlar og varpa út, at tað var stuttligt og kul at spæla hondbólt, greiðir Jastrid frá.

Tað vísti seg at rigga. Tað løgdust fleiri og fleiri gentur til hjá Stjørnuni og tá farið var undir hetta kappingarárið, vóru 27 gentur til fyrstu venjing hjá G12, samanborið við onga í fjør.

– Í G12 eru úti við 30 gentur til venjing hvørja ferð og allar eru raskar at møta upp at venja tvær ferðir um vikuna. Eisini í hinum deildunum er ein hækking, sigur ein væl nøgd forkvinna.

Stjørnan hevur í dag tvey lið í G10, tvey í G12, eitt í G14, tvey í G16 og eitt í G18, 2.deild, 1. deild og í hvonn-deildini.

At fleiri spælarar eru lagdir til, merkir so eisini, at ungdómsliðini hjá Stjørnuni ikki eru eins sterk, sum hjá fleiri av hinum feløgunum, men Jastrid sær bjart upp á framtíðina.

– Nú vit hava nógvar nýggjar leikarar, mugu vit hava tol at læra okkara ungu at spæla hondbólt. Vit mugu hava annað á dagsskránni enn úrslit, og heldur leggja dent á samanhald, at hava tað stuttligt við einum bólti og at mennast ítróttaliga. Eg rokni við, at um vit brúka okkara orku rætt og hava støðuga menning og vinalag í huga, tá tað kemur til at skipa hondbóltin, so sær framtíðin bjørt út hjá Stjørnuni, sigur Jastrid Gullaksen.

A-landsliðið hjá kvinnum úttikið

18. mars 2024

Landsliðsvenjararnir, Claus Mogensen og Simon Olsen, hava úttikið hesar 16 leikarar til EM-undandystirnar móti Svøríki og Íslandi, ávikavist á heima- og útivølli tann 3. og 7. apríl.

Íblástur við Peter Bredsdorff-Larsen

14. mars 2024

Tá føroysku A-landsliðini eru saman, er tað útyvir týdningarmiklar fyrireikingar, eisini møguleikin hjá okkara venjarum kring landið at fáa íblástur frá okkara A-landsliðsvenjarum, sum hava nógvar royndir frá altjóða hondbóltsheiminum.

Lýsing eftir dómaramennara

6. mars 2024

Føroyskur hondbóltur hevur verið í støðugari menning seinastu árini. Stóra menningin í spælinum setur alsamt størri krøv til døming og kringviðurskiftini í hesum sambandi. Ásannandi tørvin at stimbra og menna dómaraumhvørvið í føroyskum hondbólti, søkir HSF tískil eftir einum dómaramennara.