Framúr avrik av Føroyum

24-24!

Eitt úrslit, sum eingin hevði droymt um. Men tað er veruleiki. Føroyar hava fingið stig í sínum fyrsta EM-undankappingardysti móti Montenegro. Dysturin varð spældur í montenegriska høvuðsstaðnum, Podgorisa.

Føroysku spælararnir vístu góðan stríðsvilja, og í fyrra hálvleiki revsaðu teir serliga mótstøðumenninar við góðum skjótálopum. Nicholas Satchwell var eisini stinnur millum stengurnar, og føroyska verjuspælið var gott. Í hálvleikinum vóru Føroyar heldur óvæntað á odda 15-10.

Men føroyska spælið var ikki eins sannførandi eftir steðgin. Føroyska verjan tóktist í løtum at missa tamarhaldið á mótstøðumonnunum, sum í heilum spældu seg í góðar støðu. Føroyska álopsspælið var heldur ikki serliga gott. Føroyingarnir mistu ofta bóltin í uppspælinum, og teir misnýttu eisini fleiri møguleikar.

Tá 17 minuttir vóru spældir í seinna hálvleiki vann Montenegro seg á fyrsta sinni framum, 19-18. Heimaliðið dróg eisini so smátt frá, og tá fýra minuttir restaðu í var Montenegro á odda við trimum málum, 24-21.

Men føroysku spælararnir vildu ikki geva skarvin yvir. Eftir eitt timeout fingu Føroyar tvey skjót mál upp í slag. Og innskifti Niklas Simonsen hevði avgerandi leiklut, tá bara 12 sekund vóru eftir at spæla. Montenegro spældi seg í fría skotstøðu, men kvívíkingurin í føroyska málinum bjargaði í stórum stíli. Føroyar fóru síðan í skjótálop. Kjartan Johansen fann Róa Berg Hansen, sum hevði runnið seg í góða støðu – og hann skoraði og tryggjaði Føroyum eitt stig.

Megnar stríðsvilji, megnar liðavrik – eitt megnar úrslit!

Málskjúttar:
Rói Berg Hansen, 6
Jónas Gunnarson Djurhuus, 6
Allan Norðberg, 3
Nicklas Selvig, 3
Rúni Vest Højgaard, 3
Helgi Hildarson Hoydal, 2
Kjartan Johansen, 1

Hesi halda skil á landsliðunum

26. januar 2023

Øll landsliðini hjá HSF hava ein liðleiðara tilknýttan, sum tryggjar at venjingar, kappingar og virksemi kring liðini sum heild gongur smidliga.

Spennandi HM-lutakast

17. januar 2023

Føroysku U21-mennirnir fingu eitt gott og spennandi lutakast til HM-endaspælið. Føroyar komu í bólk D saman við Spania, Japan og Angola.

Stroymið U21 HM lutakastið

17. januar 2023

Í dag kl. 15.00 verður lutakastið til U21 HM-endaspælið hjá monnum, sum verður leikt í Týsklandi og Grikkalandi.