Góðkent avrik móti Danmark

Tað var greitt undan dystinum at bitin var stórur, tá føroysku kvinnurnar skuldu møta HM-bronsuvinnarunum Danmark í EM-undankappingardysti. Talan gjørdist um eitt góðkent føroyskt avrik við dystinum, sum endaði 26-15, eftir 12-9 í hálvleikinum.

Avrikið var góðkent, tí talan var um eitt føroysk lið, sum vardi væl saman við málverjunum og spældi kontrollerað og skipað í álopinum.

Føroyska liðið fekk eina góða byrjan uppá dystin og vóru á odda 3-2 eftir fyrstu 5 minuttirnar. Serliga vóru tað Jana Mittún og Súna Krossteig Hansen, sum vóru væl upplagdar við teirra sterka spælið ein móti einari. Tær løgdu nógv trýst á uttaru síða av bakkunum og hepnaðist hetta væl. Hetta vann føroyska liðnum heili 5 brotskøst í fyrra hálvleiki, sum Maria Halsdóttir Weyhe setti í málið. Hartil stóð føroyska verjan væl, har serliga Lív Zachariasen í miðverjuni í gjøgnum allan dystin var sera eyðsýnd. Í føroyska málinum stóð Annika Fríðheim Petersen sera væl, og var tað serliga donsku vongspælarunum, sum hon gjørdi lívið súrt fyri.

Danmark vann seg spakuliga fram um í leypi av fyrra hálvleiki, men hekk føroyska liðið væl í og fóru liðini til hálvleiks við støðuni 12-9 til Danmark.

Danmark økti spakuliga um leiðsluna í seinna hálvleiki. Føroyska liðið spældi seg fyri tað mesta til góðar málmøguleikar, men gekk tað sera illa at fáa mál frá vonginum í dag. Hóast eitt ótal av royndum, fekk føroyska liðið einki mál av vonginum í dag, hvørki úr vinstru ella høgru.

Talan var um eitt betri avrik í dag, í mun til dystinum mikudagin móti Rumenia. Vit kunnu fegnast um góða verju- og málverjaspælið og at føroyska liðið spældi tolið og skipað í álopinum. Minni góð var skotavgreiðslan hjá okkara vongum.

Eftir dystin var Annika Fríðheim Petersen kosin besti leikari hjá Føroyum í dystinum.

Hetta var seinasti EM-undankappingardysturin í hesum bólkaspælinum og verður tað HM-undankapping, sum verður á skránni hjá kvinnunum komandi kappingarár.

Málskjúttar:
Maria Halsdóttir Weyhe 6 (5)
Jana Mittún 3
Súna Krossteig Hansen 3
Pernille Brandenborg 1
Lív B. Zachariasen 1
Ninna Katrin Johansen 1

Dystargongdin:
5 min. 2-3
10 min. 5-4
15 min. 7-4
20 min. 8-5
25 min. 10-7
30 min. 12-9
35 min. 14-10
40 min. 16-12
45 min. 19-13
50 min. 20-14
55 min. 24-15
60 min. 26-15

U18-landsliðið hjá kvinnum úttikið

20. mai 2022

Landsliðsvenjararnir, Simon Olsen og Christoffur Gert Nielsen, hava úttikið hesar  16 leikarar til dystirnar móti Íslandi 4. og 5. juni í Íslandi.

Landsliðsvirksemi í summar

19. mai 2022

HSF hevur eina rúgvusmikla landsliðsskrá fyri ungdómslandsliðini í summar.

Aðalfundur 2022

18. mai 2022

Hondbóltssambandið boðar við hesum frá, at árligi aðalfundurin verður mikudagin 15. juni klokkan 18.30 í kantinuni í Hoyvíkshøllini.