Greitt tap fyri Rumenia

Hóast ein hampuligan fyrra hálvleik, so taptu føroysku kvinnurnar  18–10 í seinna hálvleiki, tá okkara ikki megnaðu at fylgja við. Endaliga úrslitið gjørdist 31-21 til Rumenia, eftir 13-11 í hálvleikinum.

Føroyska liðið gjørdi sum heild nógv nógv mistøk í álopsspælinum og brendi nógvar opnar málmøguleikar ígjøgnum stóran part av dystinum. Hartil var verjuspælið ikki sannførandi stórar løtur og var sostatt talan um ein av minni góðu avrikunum hjá Føroyum.

Í fyrra hálvleiki var Rumenia einar tvær-tríggjar ferðir við at renna undan Føroyum, men okkara hingu í, og tá so rumenska liðið gjørdi nakrar tekniskar villur, brendu nakrar málmøguleikar og kviku føroysku leikararnir hildu fram við at bjóða størri og tyngru leikarunum av, so helt spenningurin í dystinum sær til hálvleiks. Høvdu føroysku leikararnir verið neyvari í skotavgreiðsluni í fyrra hálvleiki, so hevði føroyska liðið verið frammanfyri, helst var hetta høvuðsfaktorurin, sum kostaði dystin.  Føroysku spælararnir misnýttu 10 av 21 skotum í fyrra hálvleiki.

Spenningurin helt sær ikki leingi í seinna hálvleiki, hóast Rakul Wardum, ið avloysti Anniku Fríðheim Petersen í málinum, byrjaði við góðari bjarging, og Føroyar síðani minkaðu um munin til 12-13. Eftir lítlari løtu fór málmunurin frá at vera tvey mál og til at vera 7 – 8 mál, og so var tað bara spurningur um, hvussu stórur munurin fór at vera.

Leygardagin verður síðsti dysturin í hesi EM undankappingini, tá ið Føroyar fáa vitjan av heimsstjørnunum í Danmark. Í kvøld vann Danmark 38 – 22 á útivølli ímóti Eysturríki.

Málskjúttar:
Marianna Geirsdóttir Eystberg 5
Turið Arge Samuelsen 3
Nina Katrina Johansen 3
Lív Sveinbjørnsdóttir Poulsen 3
Maria Halsdóttir Weyhe 2
Pernille Brandenborg 2
Súna Krossteig Hansen 1
Ingibjørg Olsen 1
Jana Mittún 1

Málverjar:
Rakul S. Wardum 22%
Annika Fríðheim Petersen 19%

 

Nýggir landsliðsvenjarar hjá U06-landsliðnum hjá monnum

22. september 2022

Kristinn Guðmundsson og Mark Lausen-Marcher eru settir í starv sum venjarar hjá U06-landsliðnum hjá monnum. Her er talan um dreingir føddir í 2006 og 2007.

Intersport Night Cup 2022

21. september 2022

Nýtið heystfrítíðina aktivt – VÍF bjóðar aftur í ár øllum hondbóltstáhugaðum at luttaka í  ársins Intersport Night Cup. Kappingin verður fyri U10, U12 og U14 gentur og dreingir.

A-landsliðið hjá monnum úttikið

20. september 2022

Landsliðsvenjararnir, Peter Bredsdorff-Larsen og Lars Porskær Møller, hava úttikið hesar 16 leikarar til EM-undandystirnar móti Ukraina og Eysturríki, sum verða ávikavist 12. og 16. oktober.