Spennandi landsliðsvenjari settur

Hondbóltssamband Føroya hevur í dag skrivað undir avtalu við íslendingin Ágúst Jóhannsson um at venja kvinnulandsliðið. Avtalan er galdandi í trý ár.

– Vit fegnast um avtaluna við Ágúst, sum er ein royndur venjari, og vóna og vænta, at mongu royndir hansara fara at koma føroyskum kvinnuhondbólti til góðar, sigur Gunn Ellefsen, sum er forkvinna í HSF.

Ágúst Jóhansson er 41 ár, og hann hevur drúgvar royndir sum venjari. Hann hevur millum annað verið landsliðsvenjari hjá íslendska kvinnulandsliðnum í fimm ár. Og liðið spældi seg eisini til síni bestu úrslit nakrantíð hesi árini. Ísland var við til HM-endaspælið í Brasil í 2011 og til EM-endaspælið í Serbia í 2012.

Ágúst Jóhansson hevur eisini verið venjari hjá Levanger í bestu norsku deildini, og hjá Sønderjyske í bestu deildini í Danmark. Í løtuni er hann venjari hjá Vali í bestu kvinnudeildini í Íslandi.

– Hondbóltssamband Føroya heitti í fjør á Dia Midjord um fyribils at standa á odda fyri kvinnulandsliðnum, tá ið vit brádliga stóðu uttan venjara miðskeiðis í EM-undankappingini. Vit eru sera takksom fyri, at Dia játtaði at taka um endan. Vit hava síðani arbeitt við at fáa  A-landsliðið hjá kvinnum í eina trygga legu, og tað hevur vónandi eydnast nú, sigur Gunn Ellefsen.

Sjálvur er Ágúst Jóhannsson spentur til uppgávuna.

– Eg havi fylgt við føroyskum hondbólti seinastu árini, og eg eri bergtikin av stóru menningini, sum hevur verið. Tí var eg eisini áhugaður beinanvegin, tá eg frætti, at HSF leitaði eftir einum landsliðsvenjara. Her eru stórir menningarmøguleikar, og eg vil fegin vera við til at flyta føroyskan hondbólt á eitt altjóða støði, sigur Ágúst Jóhannsson.

Fyrsta uppgávan hjá honum og kvinnulandsliðnum er HM-undankappingin í Sveis í døgunum frá 30. november til 2. desember. Føroyar eru í bólki við Sveis, Litava og Finnlandi.

Fyrireikingarnar byrja beinanvegin. Fyrsta landsliðssavningin verður í september.

Nýggir landsliðsvenjarar hjá U06-landsliðnum hjá monnum

22. september 2022

Kristinn Guðmundsson og Mark Lausen-Marcher eru settir í starv sum venjarar hjá U06-landsliðnum hjá monnum. Her er talan um dreingir føddir í 2006 og 2007.

Intersport Night Cup 2022

21. september 2022

Nýtið heystfrítíðina aktivt – VÍF bjóðar aftur í ár øllum hondbóltstáhugaðum at luttaka í  ársins Intersport Night Cup. Kappingin verður fyri U10, U12 og U14 gentur og dreingir.

A-landsliðið hjá monnum úttikið

20. september 2022

Landsliðsvenjararnir, Peter Bredsdorff-Larsen og Lars Porskær Møller, hava úttikið hesar 16 leikarar til EM-undandystirnar móti Ukraina og Eysturríki, sum verða ávikavist 12. og 16. oktober.