U18-kvinnur: Spania sera sterkar

Føroysku U18-kvinnurnar møttu einum sera sterkum sponskum liðið í dag. Spania vann stórsigur 36-23, eftir 19-11 í hálvleikinum.

Tað var greitt beinanvegin, at talan var um eitt gott spanskt lið, sum okkara møttu í dag. Spælið var skjótt og høvdu tær bæði gjøgnumbrots- og skotsterkar leikarar. Spanska liðið kundi væl spælt í ovaru helvt av kappingini, men var liðið í sera sterkum innleiðandi bólki, og endaðu tær við teprum tapum aftanfyri Ungarn og Frakland.

Eftir 10 minuttir var støðan longu 10-4 og øktist munurin í leypi av hálvleikinum. Okkara høvdu sera trupult við at fáa fatur í verjupartinum, og hóast okkara arbeiddu væl í álopinum og fingu fleiri góð mál, so vantaði seinasti neyvleikin eisini í fleiri førðum. Besti leikarin hjá Føroyum í fyrra hálvleiki var málverjin, Silja Arngrímsdóttir Müller, sum hevði fleiri góðar bjargingar.

Føroyar komu sera illa út til seinna hálvleik og gjørdu eina ørgrynnu av tekniskum villum. Spanska verjan kom heilt fram at verja Mariu Pálsdóttir Nólsoy, sum helst er sterkasti álopsleikarin á føroyska liðnum, og hetta ørkymlaði føroyska liðið nógv og framprovokeraði villur frá okkara leikarum. Eftir 5 minuttir av seinna hálvleiki var støðan 21-13 og dysturin var væl og virðiliga avgjørdur.

Føroysku kvinnurnar skulu nú spæla um 19. pláss av 32 í HM-kappingini. Tann dysturin verður móti Slovenia í morgin, mánadagin kl. 16.00.

Málskjúttar hjá Føroyum:
Lukka Arge 6
Karin Egholm 4
Maria Pálsdóttir Nólsoy 3
Inga Maria Joensen 3
Anna Elisabeth Halsdóttir Weyhe 2
Inga Maria Roysdóttir 1
Sára Sigrunadóttir Mikkelsen 1
Karina Debes Heinesen 1
Lea Mohr 1
Hanna Jakobsdóttir Dalsgaard 1

Nýggir landsliðsvenjarar hjá U06-landsliðnum hjá monnum

22. september 2022

Kristinn Guðmundsson og Mark Lausen-Marcher eru settir í starv sum venjarar hjá U06-landsliðnum hjá monnum. Her er talan um dreingir føddir í 2006 og 2007.

Intersport Night Cup 2022

21. september 2022

Nýtið heystfrítíðina aktivt – VÍF bjóðar aftur í ár øllum hondbóltstáhugaðum at luttaka í  ársins Intersport Night Cup. Kappingin verður fyri U10, U12 og U14 gentur og dreingir.

A-landsliðið hjá monnum úttikið

20. september 2022

Landsliðsvenjararnir, Peter Bredsdorff-Larsen og Lars Porskær Møller, hava úttikið hesar 16 leikarar til EM-undandystirnar móti Ukraina og Eysturríki, sum verða ávikavist 12. og 16. oktober.