Kjølbro heilsøla heldur fram sum stuðul hjá Hondbóltssambandi Føroya. Partarnir hava longt verandi sponsorsáttmála, og verður Kjølbro heilsøla verandi ein av sjónligu stórstuðlunum hjá HSF.
Nýggi sáttmálin var undirskrivaður herfyri, tá Andrass Thomsen, stjóri í HSF, var og vitjaði Kjølbro á Stangavegi í Klaksvík, har sáttmálin var undirskrivaður saman við Árna Frederiksberg, stjóra í fyritøkuni.
– Ítróttur hevur veruliga sett Føroyar á heimskortið í seinastuni. Hetta m.a. við endaspølunum í kvinnu- og manshondbólti, sum veruliga hava vakt ans. Handan tílík úrslit liggur hart arbeiði og nærlagni, og hetta er nakað vit sum fyritøka kenna okkum aftur í og gjarna vilja stuðla, sigur Árni Frederiksberg.
– Andrass Thomsen viðmerkir til longda sáttmálan, at tað er hugaligt at fylgja stóru tilgongdini av børnum og framgongdini sum er í hondbóltinum í norðurøkinum. Alt byrjar við barnahondbóltinum. At hava sterkar stuðlar kring alt landið, at standa saman og at allar hondbóltsføroyar kenna seg eiga ein lut í okkara landsliðum hevur alstóran týdning skulu vit røkka okkara málum.
Avtalan er galdandi til 2028.
