Kunning

Almenn kunning til landsliðsleikarar hjá HSF

Hendan kunning er ætlað øllum leikarum, sum eru partur av landsliðsarbeiðinum hjá HSF. Hondbóltssambandið ynskir við hesum skrivi at kunna um ymisk viðurskifti, sum hava týdning fyri landsliðsleikarar til dagligt, í venjing, og tá leikarar ferðast í sambandi við landsliðsuppgávur.

Persónligir upplýsingar
Tá ein leikari verður úttikin til ein landsliðshóp, er tað ábyrgdin hjá viðkomandi leikara at senda liðleiðaranum fyri viðkomandi landsliðið fylgjandi upplýsingar:

Navn, føðingardag, felag, bústað, telefonnummar, teldupostbústað, stødd á klæðum (XS, S, M, L, XL, XXL), passnummar og kontaktpersónar heima (navn og telefonnummar hjá einum ella tveimum avvarðandi persónum, sum HSF kann seta seg í samband við, um tørvur er á tí undir venjing ella undir eini uttanlandsferð við einum landsliði ella bólki í leikaramenningini).

Somuleiðis skulu landsliðsleikarar í samband við uttanlandsferðir, senda HSF eina skriftliga váttan, at teir hava síni tryggingarviðurskifti í lag. Hetta fyri at tryggja, at ongar misskiljingar eru. Hevur HSF ikki fingið hesar upplýsingar, er tað at skilja, sum at leikarin hevur síni viðurskifti í lagi.

Heilivágur/doping
Tað er uppgávan hjá landsliðsleikaranum at boða liðleiðaranum fyri viðkomandi landsliði frá, um viðkomandi leikari tekur heilivág, sum tað er neyðugt at vita nakað um, og sum evt. krevur serligt loyvi at ferðast við.

Tað er sera umráðandi, at hetta verður gjørt í góðari tíð í sambandi við landsliðsuppgávur, soleiðis at neyðug loyvir og váttanir kunnu fáast til vega, um tað er neyðugt.

Um hetta ikki verður gjørt, er vandi fyri at viðkomandi leikari verður tikin fyri doping.

Sí annars vegleiðing hjá ÍSF: https://isf.fo/antidoping/.

Serligur tørvur
Tað er uppgávan hjá landsliðsleikaranum at boða viðkomandi liðleiðara frá, um leikarin hevur ovurviðkvæmi ella annað, sum krevur, at tað verða tikin serlig atlit. Í sambandi við landsliðsuppgávur ber t.d. til at fáa serligan mat, um boðað verður frá í góðari tíð.

Egingjald
Starvsnevndin hevur samtykt, at allir leikarar, sum eru við á uttanlandsferð við ungdómslandsliði ella við leikaramenningini, skulu gjalda eitt egingjald. Egingjaldið er í mesta lagi kr. 3.500,- fyri hvørjaferð og í mesta lagi kr. 4.000,00 um árið.

Trygging
Tað er ábyrgdin hjá hvørjum einstøkum leikara at hava síni tryggingarviðurskifti í lagi, soleiðis sum hvør einstakur ynskir sær tað. Tó er ferðatryggingin hjá HSF galdandi fyri yrkisleikarar.

Ítróttarsamband Føroya (ÍSF), sum HSF er limur í, hevur eisini eina vanlukkutrygging, sum er galdandi í sambandi við venjingar og kappingar heima í Føroyum. Meira kann lesast um hesa tryggingina á heimasíðuni hjá ÍSF, sí: Felags vanlukkutryggingin

HSF vil samstundis viðmæla øllum úrvalsíðkarum og landsliðsleikarum í hondbólti at tekna eina sokallaða viðgerðartrygging, sum tryggjar, at ein leikari, sum verður skaddur, kann fáa viðgerð alt fyri eitt og sleppa undan bíðitíðini, sum ofta er á almennum sjúkrahúsum. 

Atburður
Føroyskir landsliðsleikarar og leikarar, sum eru við í leikaramenningini hjá HSF, eiga at vísa góðan og jaligan atburð. Í sambandi við venjing, uttanlandsferðir, til dagligt og sum heild umboða leikarar, sum eru partur av føroyskum landsliði í hondbólti og leikaramenningini, Føroyar og føroyskan hondbólt á sømuligan hátt við góðum atburði og við virðing fyri hvørjum øðrum.

Klæðir og Sponsorar
Tað er ábyrgdina hjá landsliðsleikarum at virða klæðna- og sponsorsáttmálarnar hjá HSF. Landsliðsleikarar mugu til eina og hvørja tíð, í samband við landsliðsvirksemi, í tann mun tað er møguligt, verða í røttum klæðum, har sponsorarnir framganga.

Sosialu miðlarnir
Tá føroysku hondbóltsslandsliðini eru á ferð, er tað vanligt, at leikararnir fáa til uppgávu at leggja myndir og annað út á sosialu miðlarnar, Facebook, Instagram, Snapchat o.s.v. Tað er sera umráðandi, at leikararnir taka uppgávuna í størsta álvara og gera sær ómak, soleiðis at tað bara eru sponsorarnir hjá HSF, sum framganga av klæðunum á myndunum, og at føroyskur landsliðshondbóltur verður framsettur á virðiligan hátt.

Loyvd frávera
Allir úrvalsíðkarar kunnu søkja um loyvda fráveru í samband við ítrótt. Til dømis í samband við kappingar, venjingarlegur og annað.

Úrvalsíðkari merkir næmingur, sum ÍSF saman við avvarandi sambandi metir hava serliga góðar førleikar inni tær ítróttargreinar, sum ÍSF umboðar. Fyri at verða góðkend/ur sum úrvalsíðkari, er neyðut at senda umsókn til ÍSF, ið síðan kunnar íðkaran og skúla, um hesin verður mett/ur at vera úrvalsíðkari.

Nærri kunning um skipanina sæst her: www.uvs.fo/urval. Umsókn skal sendast til undirvising@uvs.fo.