Lív í bestu donsku hondbóltsdeildini

Lív Sveinbjørnsdóttir Poulsen úr Vestmanna fekk í gjárkvøldið debut í bestu donsku hondbóltsdeildini við liðnum Herning-Ikast.

Hon spældi 20 minuttir á høgra vongi og skeyt eitt mál. Herning-Ikast vann 29-18 á Ajax København.

– Eg væntaði ikki at fáa spælitíð í fyrsta dysti, so eg eri ógvuliga fegin um møguleikan, sigur vinstrahenti leikarin.

Lív er júst fylt 17 ár og gongur á hondbóltsakadaminum hjá Ikast. Hon flutti til Danmarkar í fjør at ganga á hondbóltsskúlanum og beit seg beinanvegin fasta á U16-liðið hjá felagnum. Hon og liðfelagarnir vóru eisini danmarkarmeistarar í fjør.

Hetta kappingarárið hevur hon eisini gjørt um seg á U18-liðnum.

Avrikini hava verið so góð, at hon er nú partur av ligaliðnum hjá Herning-Ikast.

Á liðnum eru fimm A-landsliðsleikarar, millum annað Sarah Iversen hjá Danmark og Helene Fauske hjá Norra.

– Eg var rættiliga nervøs, tá eg byrjaði at venja saman við teimum, tí fleiri teirra eru leikarar, sum eg síggi upp til, men eg bleiv ógvuliga væl móttikin, greiðir Lív frá.

Unga vestmannagentan hevur eitt greitt hondbóltsmál.

– Málið er at liva av hondbóltinum. Eg venji hart og miðvíst. Eg havi ment meg nógv hetta árið í Danmark og vónandi heldur menningin fram. Eg fari so í øllum førum at gera mítt ítarsta, sigur Lív.

Herning-Ikast hevur eftir sigurin í gjár 28 stig og liggur á einum fimta plássi, fýra stig frá annaðplássinum.

VÍF-kvinnur úti úr European Cup

7. oktober 2024

Hóast ein flottan 27-26 sigur í seinna dystinum móti italsku Jomi Salerno, eru VÍF-kvinnur úti úr European Cup. VÍF-kvinnur taptu fyrra dystin greitt, 27-21, og blivu tað sostatt Jomi Salerno, sum fóru víðari við einum samlaðum 53-48 sigri.

Atgongumerki til Ukraina – Føroyar

5. oktober 2024

Fyri einari tíð síðani var greitt, at EM-undankappingardysturin millum Ukraina og Føroyar verður leiktur í Vilnius í Litava, sunnudagin tann 10. november 2024 kl. 15:00.

Skeið innan styrkivenjing

4. oktober 2024

Hósdagin 10. oktober 2024 verður skeið innan styrkivenjing í Bylguni í Runavík frá kl. 19:00 til 22:00.

Ein loysn frá Sendistovuni