Trý av fýra stigum móti Niðurlondum! Føroyar spældu ein rimmar dyst í Almere og vunnu 32-31, eftir 15-15 í hálvleikinum. Drivnir fram av gott túsund føroyskum áskoðarum, vunnu okkara fyri fyrstu ein útidyst í EM-undankapping. Enn ein varði á leiðini!
Dysturin byrjaði heldur nervøst hjá báðum liðum, onkur villa og okkurt brent skot, men gekk tað javnt á. Føroyska verjan skuldi líka fáa tak á Luc Steins, men stóð eftirhondini heilt væl. Eyðsýnt vildu okkara taka leikferðina úr dystinum og spældu 7 móti 6 í álopinum. Hetta hepnaðist væl og komu okkara fyri tað mesta til góðar kjansir. Føroyar vóru fyri tað mesta frammanfyri við einum ella tveimum, men kostaðu nakrir brendir møguleikar seinastu løtuna fyri hálvleik leiðsluna. Liðini fóru til hálvleiks við 15-15.
Føroyar fingu eina flúgvandi byrjan uppá seinna hálvleik. Álopið koyrdi væl og løgdu Elias og Óli eitt støðugt trýst á Niðurlendsku verjun. Eins og í fyrra hálvleiki funnu teir væl Ísak Vedelsbøl á strikuni, sum spældi væl og fekk síni fyrstu mál á A-landsliðnum í dag. Tá so Pauli Jacobsen eisini hevði nakrar stórbjargingar vóru Føroyar brádliga á odda við fýra málum um miðjan hálvleik. Hákun West av Teigum, sum ikki fekk nógvar bóltar í fyrra hálvleiki var eisini avgerandi í seinna hálvleiki við fimm góðum málum á høgra vongi. Hann bleiv væl uppspældur av Allani Norðberg, sum eisini spældi ein fínan dyst á høgra bakki og gjørdi fimm mál. Niðurlendingar høvdu hug at hála inn seinastu løtuna, men megnaðu okkara at halda stand seinastu løtuna og stóðu við krútverju og vilja seinasta álopið hjá Niðurlendingum. Tað endaði 32-31 til Føroyar og liggja Føroyar nú nummar 1 í bólki 6.
Eftir dystin var føroyski málverjin Pauli Jacobsen kosin besti leikari á føroyska liðnum. Næsti dystirnir hjá Føroyum eru móti Kosovo, á útivølli hósdagin 8. mai kl. 19.15, føroyska tíð, og á heimavølli Við Tjarnir sunnudagin 11. mai kl. 17.00. Tá verður endaliga greitt hvørt Føroyar koma víðari til EM-endaspælið í Oslo.
Málskjúttar hjá Føroyum:
Elias Ellefsen á Skipagøtu (6) 8
Óli Mittún 6
Allan Norðberg 5
Ísak Vedelsbøl 5
Hákun West av Teigum 5
Teis Horn Rasmussen 2
Tróndur Mikkelsen 1
Málverjar:
Pauli Jacobsen 9 bjargingar
Aleksandar Lacok 1 bjarging
Dystargongdin Niðurlond – Føroyar:
5 min: 3-2
10 min: 4-4
15 min: 5-7
20 min: 8-8
25 min: 11-13
30 min: 15-15
35 min: 17-18
40 min: 19-22
45 min: 21-24
50 min: 24-26
55 min: 27-30
60 min: 31-32
