Hóast portugisar ikki vóru ræðandi, so sýntist tankarnir longu vera við avgerandi dystirnar í morgin og leygardagin, tá HM-plássini verða avgjørd. Ávísir leikarar, sum hava spælt nógv í kappingni vóru partvís hvíldir og høvdu okkara ilt við at finna rútmuna í dag. Føroyar taptu greitt, 36-27, fyri Portugal. Hálvleikstøðan var 22-13.
Føroyar byrjaðu dystin við 7 móti 6 í álopinum og var leikferðin lá. Hetta trýsti, annars offensivu portugisisku, verjuna aftur og gav málmøguleikar. Tíverri vóru eisini nógvar villur í álopinum og vóru flestu portugisisku málini skotin í tómt mál fyrstu løtuna. Dysturin gekk tó javnt á fyrstu 15 minuttirnar, hareftir tað vóru portugisar, sum vunnu seg fram um. Verjan haltaði og fekk ikki fatur rykkunum á strikuni. Portugisar komu lætt til málini vóru frammanfyri heili 22-13 í hálvleikinum.
Seinni hálvleikur var tættari og endaði javnur. Fleiri føroyskar útskiftingar vóru gjørdar í hálvleikinum og bleiv álopsspælið eisini nakað hvassari. Verjan hevði tó enn trupulleikar og vóru okkara ongantíð nær við at fáa spenning í dystin. Dysturin endaði 36-27 til Portugal.
Eftir dystin var føroyski spælskiparin, Fríði Holm í Innistovu, kosin besti leikari hjá Føroyum í dystinum. Fríði var hvassast í føroyska álopinum í dag, og var hann eisini toppskjútti við 7 málum. Næsti dystur hjá Føroyum verður í morgin, fríggjadagin, móti nr. 3 í miðumfarinum í bólki I. Tíðspunktið kemur út í kvøld . Allir dystir kunnu stroymast á live.hsf.fo, hetta um tú ert staddur í Føroyum.
Dystarskrá, úrslit o.a. frá U18 EM-endaspælinum síggjast her: M18 EHF EURO 2024 (eurohandball.com)
Dystargongdin Portugal – Føroyar
5 min. 2-2
10 min. 5-6
15. min. 11-9
20 min. 14-12
25 min. 19-13
30 min. 22-13
35 min. 23-14
40 min. 27-17
45 min. 29-18
50 min. 31-22
55 min. 33-24
60 min. 36-27
Málskjúttar hjá Føroyum:
Fríði Holm í Innistovu 7
Magnus Árason 3
Helgi Haldórsson 3
Lýðar í Dímun 2
Filip Haldansen 2
Erling Erlendsson 2
Haraldur Karlsson 2
William N. Djurhuus 2
Pauli Rasmussen 1
Jógvan Andreas Lamhauge 1
Jákup Egholm 1
Rúnar Hammer 1
Málverjar:
Ingi Johannesen 20 min., 5 bjargingar, 36%
Bjarni Gunnarsson Jacobsen 40 min., 6 bjargingar, 20%
