FM-finaluliðini hjá monnum kappingarárið 2018/19 eita H71 og Neistin.
Tað gjørdist greitt, tá triðju og avgerðandi hálvfinalurnar vórðu spældar í gjárkvøldið.
Í einari stúgvandi fullari Hoyvíkshøll hittust H71 og VÍF. Lagt var upp til ein spennandi dyst og tað gekk eisini javnt á í fyrra hálvleiki, men í øðrum hálvleiki steðgaði fullkomiliga upp hjá vestmenningum og hoyvíkingar drógu frá og vunnu 28-21, og vunnu sær harvið pláss í FM-finalunum.
Í Høllini á Hálsi hittust hini bæði hálvfinaluliðini, Neistin og Kyndil. Eins og undanfarnu dystir gekk javnt á allar 60 minuttirnar. Liðini skiftust um leiðsluna og tað var ongantíð meira enn tvey mál á muni.
Tað, sum eyðmerkti dystin varð hart og verjukent spæl, sum gav eina rúgvu av útvísingum og tvey reyð kort til Kyndil. Neistin vann dystin 21-20, og hevur tryggjað sær atgongumerki til FM-finalurnar.
Fyrsta FM-finalan er um vikuskiftið. Spælast skal best av fimm møguligum finalum. Tríggjar skulu vinnast fyri at vinna FM. Liðið, sum endaði ovari í landskappingini eftir trý umfør, velur hvar fyrsti dystur skal spælast og hevur rætt til heimavøll í møguligum fimta dysti.
Dystarskrá:
Leygardagin 30. mars
Kl. 18.00 bronsudystur: VÍF – Kyndil
Sunnudagin 31. mars
Kl. 18.00 finala 1: H71 – Neistin
Mikudagin 3. apríl
Kl. 20.00 finala 2: Neistin – H71
Hósdagin 18. apríl
finala 3: H71 – Neistin
Mánadagin 22. apríl
finala 4: Neistin – H71
Leygardagin 27. apríl
finala 5: H71 – Neistin
