Mistu á stokkinum

Tað bleiv spenningur til síðsta bríksl, tá U18-manslandsliðið hjá Føroyum í morgun spældi móti Makedonia í EM-kappingini, sum í hesum døgum er í Georgia. 

Føroyar byrjaðu væl og løgdu seg á odda við tveimum málum og hildu leiðsluna fyrstu 20 minuttirnar. Tá kom vend í og Makedonia legði seg á odda 12-11 og dró frá. Makedonia fekk tvey brotskøst, sum Pauli Jacobsen í føroyska málinum vardi fyri, men føroysku spælararnir vóru ov seinir av samla upp. Makedonar fangaðu bóltin aftur og skoraðu. Støðan versnaði, tá Føroyar fingu tvær útvísingar. Við fimm móti sjey monnum, gjørdist støðan 16-12 til Makedonia.

Nú skuldi nógv til, og ábendingar vóru um, at nú var farið. Men ídnu og evnaríku føroysku leikararnir prógvaðu sítt dirvi.

Við nøkrum framúr bjargingum frá Paula Jacobsen og við góðum kontraspæli, eydnaðist tað Føroyum at heinta øll fýra málini innaftur eftir bara hálvantriðja minutt. Síðsta málið til hálvleiksstøðuna 16-16 skeyt Hákun Vest av Teigum í síðsta sekundi og føroysku dreingirnir fóru við uppreistari pannu í skiftingarrúmið at fáa góð ráð frá venjaranum, Birgiri Hansen.

Spenningur til síðsta bríksl
Seinni hálvleikur var óvanliga spennandi. Liðini fylgdust allatíðina, sum oftast vóru Føroyar omaná við einum máli. Føroyar spældu góðan álopshondbólt, men tað haltaði nakað í verjuni, men ferð eftir ferð tók Pauli Jacobsen millum føroysku stengurnar skotini.

Í síðsta minutti javnaði Makedonia til 29-29 og Føroyar fóru í álop. Spælt var inn á strikuna og dømt var brotskast til Føroyar. Dánjal Ragnarson varð settur at skjóta, men hann misnýtti. Makedonia fór í álop, tá bara átta sekund vóru eftir, og tað sum ikki skuldi henda, hendi. Makedonia, sum hevði ein mann í yvirtali, spældi til ein frían høgravong sum skoraði og tryggjaði Makedonia sigurin.

Tað var sum vera man nakrir ógvuliga vónbrotnir dreingir eftir dystin, sum Føroyar uttan iva hevði uppiborið at vunnið.

Í morgin skulu Føroyar royna seg móti Litava.

Málskjúttar:
Elias á Skipagøtu, 10
Hákun Vest av Teigum, 10
Julian Kragesteen, 3
Tróndur Mikkelsen, 2
Pauli Mittún, 2
Sakaris Aviano Sakarisson, 1
Dánjal Ragnarsson, 1

Manslandsliðið er úttikið

16. apríl 2025

Hesir skulu royna at vinna Føroyar til EM-endaspælið. Landsliðsvenjararnir, Peter Bredsdorff-Larsen og Hjalti Mohr Jacobsen, hava úttikið hesar 16 leikarar til EM-undankappingardystirnar móti Kosovo og Ukraina í mai.

Soleiðis verður HM-endaspælið

14. apríl 2025

Við kvinnunum luttaka Føroyar fyri fyrstu ferð nakrantíð í einum HM-endaspælið fyri vaksin. HM-endaspælið verður leikt í Týsklandi og Niðurlondum í døgunum 26. november til 14. desember 2025.

Søga! – HM-endaspælið veruleiki!

13. apríl 2025

Føroysku kvinnurnar gjørdu nóg mikið. Føroyar skulu til HM-endaspælið eftir sigur við 9 málum samanlagt móti Litava. Seinni dysturin í Litava var tó misjavnur, og Føroyar taptu 30-29, eftir at Litava var frammanfyri 14-11 í hálvleikinum.

Ein loysn frá Sendistovuni