Hondbóltssambandið og Sendistovan hava longt stuðlasamstarvið. Sendistovan, sum hevur verið stuðul hjá HSF í góð 10 ár, er nú vorðin stórstuðul.
Snið- og samskiftisfyritøkan, sum heldur til á Stiðjagøtu 11 í Havn, hevur staðið fyri øllum design- og lýsingartørvi hjá Hondbóltssambandinum seinastu 10 árini. Jógvan Emil, næstformaður í Starvsnevndini hjá HSF, var herfyri og vitjaði Sendistovuna, har nýggi sáttmálin var undirskrivaður saman við Christiani Nagata, nevndarformanni.
– Samstarvið við Sendistovuna hevur verið fyrimyndarligt, har teir við tryggum hondum hava loftað einhvørjum tørvi vit havt á ferðini seinastu árini, hetta hvørt tað hevur verið í mun til heimasíðu, dystarlýsingar ella branding av øllum slag, viðmerkir Jógvan Emil.
– Christian Nagata viðmerkir til nýggja sáttmálan, at sum viðleikari hevur tað eisini verið spennandi at vera við á framfýsnu hondbóltsferðini seinastu árini. Krøvini kring branding til altjóða dystir er hækkað, so hvørt sum landsliðini hava spælt á hægri stigi. Her hava vit roynt at fáa føroyska hondbóltin at skína og vísa seg í besta hami, og tað haldi eg hevur eydnast rættiliga væl.
Sáttmálin er galdandi fram til 2028.
