U21-menn: Føroyar víðari við sigri á Japan

Góða føroyska álopsspælið, við vælskorandi vengrum, var grundarsteinurin undir føroyska 39-34 sigrinum á Japan í dag. Hálvleiksstøðan var 21-17 til Føroyar.

Dysturin gekk javnt á fyrstu løtuna og fingu bæði liðini mál í nærum hvørjum álopi. Okkara høvdu ilt við at fáa fatur á fótfimu japanarunum í verjuni, og var hetta galdandi fyri stóran part av dystinum. Japanar skutu eisini væl útifrá og høvdu føroysku málverjarnir ikki bestu arbeiðstreytir og fingu ikki rættiliga fatur.

Í álopinum, hinvegin, gekk væl. Tað lá serliga væl fyri hjá Eliasi Ellefsen á Skipagøtu og hinum at spæla okkara vengur upp, sum vóru sera tryggir í teirra skotum. Janus Dam Djurhuus á vinstra vongi og Hákun West av Teigum gjørdu ávikavist 6 og 7 mál hvør í fyrra hálvleiki. Um miðjan fyrra hálvleiki vann føroyska liðið seg nøkur mál fram um. Aleksandar Lacok kom inn í føroyska og hevði nakrar bjargingar, og tá okkara so skoraðu nærum hvørja ferð, var hetta nokk til at okkara tóku leiðsluna við nøkrum málum. Elias á Skipagøtu var sera vælspælandi og royndu japanar eisini at mansverja hann, men okkara svaraðu aftur við at spæla 7 móti 6 og hepnaðist hetta eisini væl og japanar fullu aftur í verjuni. Hálvleiksstøðan var 21-17 til Føroyar.

Elias helt áfram í seinna hálvleiki og var allatíðina vandamikil. Okkurt hava Elias og hinir lært av japonskum hondbólti, tí tvær ferðir í dystinum gjørdu føroyingar ein sonevndar “japanara”, har vongurin fyrst verður spældur í luftuni, fyri síðani at spæla innaftur til miðjuna, sum eisini kemur í luftini. Tað gav mál báðar ferðir. Føroyska verjan fekk ikki fatur fyrstu 10 minuttirnar av seinna hálvleiki, men um miðjan hálvleik gekk betri og høvdu Føroyar eitt skifti eina leiðslu uppá 7 mál. Seinastu 10 minuttirnar ráddi um at halda leiðsluna og megnaðu okkara hetta og koyrdu sigurin heim við 39-34.

Eftir dystin var Hákun West av Teigum kosin besti leikari í dystinum. Føroysku vengurnir spældu sera væl í dag, har Hákun gjørdi 10 mál, Janus 6 og Pauli 1.

Næsti dystur hjá Føroyum er ímóti Spania. Tann dysturin er fríggjadagin kl. 19.15, føroyska tíð. KVF vísir dystin. Um Spania vinnur sín dyst móti Angola í dag, so verður dysturin móti Spania avgerandi fyri, hvør vinnur bólkin og hevur tvey stig við sær til meginumfarið, har mótstøðan verður Portugal og Brasil.

Lesið alt um kappingina, úrslit, støður o.a. her:
IHF | Competition Home Page

Dystargongdin:
5 min. 4-3
10 min. 9-7
15 min. 13-10
20 min. 14-12
25 min. 18-14
30 min. 21-17
35 min. 24-19
40 min. 28-22
45 min. 32-26
50 min. 35-28
55 min. 36-31
60 min. 39-34

Málskjúttar hjá Føroyum:
Elias Ellefsen á Skipagøtu 11 (2)
Hákun West av Teigum 11 (1)
Janus Dam Djurhuus 6
Rói Ellefsen á Skipagøtu 4
Pauli Mittún 3
Ísak Vedelsbøl 2
Pauli Høj 1
Bjarni í Selvindi 1

Málverjar:
Pauli Jacobsen 21%
Aleksandar Lacok 43%

Kemilux nýggjur stórstuðul hjá HSF

28. september 2023

Hondbóltssambandið og Kemilux hava í dag skrivað undir samstarvsavtalu, har Kemilux verður ein av stórstuðlunum hjá HSF í 2024 og 2025.

Intersport Night Cup 2023

26. september 2023

Nýtið heystfrítíðina aktivt! VÍF bjóðar aftur í ár øllum hondbóltstáhugaðum at luttaka í  ársins Intersport Night Cup. Kappingin verður fyri U10, U12 og U14 gentur og dreingir. 

Neistin víðari og H71 úti

26. september 2023

Bæði H71-kvinnur og Neistakvinnur vunnu annan European Cup dyst í vikuskiftinum. Hjá H71 var hetta tó ikki nokk, tá tær taptu stórt í fyrra dystinum, meðan Neistin vann eftir brotskast kapping.