Fans, Faroe Islands vs Denmark, Women's EHF EURO 2024, Austria, Hungary, Switzerland, 03.12.2024, Mandatory Credit © Nebojsa Tejic / kolektiffÍ apríl skal A-landsliðið hjá kvinnum í hondbólti spæla tveir playoff dystir ímóti Litava um luttøku í HM endaspælinum, sum verður í november og desember í ár. Fyrri dysturin verður í Føroyum í stórhøllini við Tjarnir 9. apríl og seinni dysturin í Litava, sunnudagin 13. apríl.
Fyri at geva kvinnunum bestu fortreytir og mest møguligan stuðul, hevði verið gott at fingið so nógvan stuðul heimanifrá, sum til ber. Atlantic Airways fer at flúgva landsliðið beinleiðis til Kaunas í Litava, og har verður eisini pláss fyri fjepparum við á túrinum. Flogið verður til Kaunas úr Vágum fríggjadagin 11. apríl kl. 17.45 og heim aftur mánadagin 14. apríl kl. 14.00, og sølan av ferðaseðlum byrjar týsdagin 25. februar.
Sjálvur dysturin verður spældur í Jonava uml. 30 minuttir frá Kaunas, og skipað verður fyri bussflutningi til og úr Jonava. Atgongumerkini til dystin kosta 80 kr. og kunnu bíleggjast við at senda teldupost til hsf@hsf.fo. Atgongumerkini til heimadystin koma til sølu mándagin 10. mars.
