Hondbóltssamband Føroya og stórstuðulin Hotel Djurhuus hava longt stuðulssamstarvið tvey ár fram. Avtalan er galdandi til og við 2027, og hevur við sær, at navnið á gistingarhúsinum framvegis verður at síggja á leikbúnunum hjá landsliðunum.
Andrass Thomsen, stjóri í HSF, var herfyri niðri á Hotel Djurhuus, har nýggi sáttmálin varð undirskrivaður saman við Jenny í Heiðunum, hotelstjóra, og Rúna Djurhuus, eigara.
Tá landsliðini hjá okkum spæla á heimavølli, hýsir Hotel Djurhuus teimum vanliga dagin fyri dyst, og búgva útiliðini eisini javnan yviri við Strond.
– Tað er ein gleði at kunna stuðla hesum frægu hondbóltsleikarum, sum ferð eftir ferð lyfta yvirleggjaran fyri hvat er møguligt hjá okkum at røkka úti í heimi. Vit eru errin, at hava fleiri av bestu hondbóltstjóðunum gistandi hjá okkum og ynkja vit at veita teimum bestu umstøðurnar áðrenn dyst, sigur Jenny í Heiðunum, hotelstjóri.
Andrass Thomsen sigur um longda samstarvið:
– Vit eru sera væl nøgd við umstøðurnar, tá okkara landslið gista á hotellinum upp til dystir. Vitjandi liðini eru altíð væl nøgd og hetta vilja vit sjálvandi halda fast við.
