Ikki nóg kaldar

Hóast føroyska kvinnulandsliðið reisti seg og vann 29-28 móti Kosovo í dag, so var tað ikki nokk til at koma víðari til næsta umfar í HM-undankappingini.

Fyri fullsettari høll í Istog í Kosovo var maksimalt trýst á føroyska liðnum. Okkara skuldu vinna við trimum málum eftir 29-26 ósigurin í gjár. Føroyska liðið hevði møguleikan at fáa síðsta málið til 30-27 og harvið samlaða sigurin seinasta álopið, tá 9 sekund vóru eftir, men bólturin var fiskaður og so Kosovo um munin í tómt mál við dystarlok.

Føroyska liðið vísti betri álopspæl í fyrra hálvleiki í dag, í mun til í gjár, og komu í flestu álopunum til góðar kjansir. Liðið hevði fleiri góð innspøl til strikuna, har Pernille Brandenborg fekk tvey mál og tvey brotskøst. Eisini kom Rannvá Olsen væl ígongd á vinstra vongi og fekk 4 góð mál. Jana Mittún var enn sum áður ágangandi og breyt ferð eftir ferð ígjøgnum verjuna og skeyt 5 mál í fyrra hálvleiki. Stóri spælarin í fyrra hálvleiki var tó málverjin Rakul Wardum, sum kom inn um miðjan hálvleik og hevði heili 8 bjargingar.

Verjan hekk aftur heldur illa saman í dag og komu leikarar ferð eftir ferð at standa ov einsamallir. Hartil fór størsti parturin av langskotunum hjá stórskjúttanum Leonora Demaj inn. Hon skeyt 9 mál í fyrra hálvleiki. Føroyska liðið var, hóast hetta, frammanfyri størra partin av fyrra hálvleiki, tað einu løtuna við trimum, áðrenn Kosovo minkaði aftur.

Føroyar góðar byrja uppá seinna hálvleik og vunnu seg trý mál fram um eftir 38 minuttir. Hereftir gjørdist tættari aftur og fylgdust liðini eina løtu og var Kosovo eisini frammanfyri við tveimum. Føroyska verjan fekk tó brádliga væl fatur um miðjan seinna hálvleik og bardi føroyska liðið seg innaftur í dystin seinastu løtuna og var tað Rakul Wardum í føroyska málinum, sum var stóri munurin. Hóast hetta, so vóru okkara ikki nóg kaldar seinastu løtuna. Føroysku vengurnir høvdu ov lág skoringsprosent í seinna hálvleiki og kiksaðu okkara ov nógv í avgerandi løtum, harímillum seinasta álopið, tá samlaða støðan kundi avgerðast til føroyska fyrimun.

Málskjúttar hjá Føroyum:
Marianna Geirsdóttir Eystberg 6 (5)
Jana Mittún 6
Súna Krossteig Hansen 4
Rannvá Olsen 4
Lív Sveinbjørnsdóttir Poulsen 3
Pernille Brandenborg 2
Vár Zachariasen 2
Maria H. Weyhe (2)

Málverjar:
Rakul Wardum 15 bjargingar
Annika Fríðheim Petersen 1 bjarging

Dystargongdin:
Kosovo – Føroyar
5 min. 2-3
10 min. 7-6
15 min. 9-8
20 min. 10-10
25 min. 14-16
30 min. 16-16
35 min. 17-19
40 min. 21-21
45 min. 23-23
50 min. 25-25
55 min. 26-27
60 min. 28-29

A-landsliðið hjá monnum úttikið

19. apríl 2024

Hesir 16 skulu møta Norðurmakedonia og spæla um eitt pláss í HM-endaspælinum.

Danmark, Sveis, Kroatia og FØROYAR

18. apríl 2024

Basel í Sveis verður heimstaðurin hjá føroyingum til EM-endaspælið hjá kvinnum í november/desember. Føroyar komu í bólk D saman við grannum okkara úr Danmark, vertunum Sveis og Kroatia.

EM lutakast hósdagin

17. apríl 2024

Í morgin, hósdagin kl. 17.00, føroyska tíð, verður lutakastið til EM-endaspælið hjá kvinnum. Tá verður eisini greitt, hvørt Føroyar skulu spæla í Basel, Innsbruck ella Debrecen.