Kimiligari hondbóltsspælarar

Ein spennandi og lærurík European Open kapping í Gøteborg er liðug, har U16 genturnar endaðu á einum 16. plássi. Kappingin var í døgunum frá 2. til 6. juli 2018.

Føroyska liðið spældi tilsamans átta dystir, harav liðið stóð seg væl ímóti Hollandi, Georgia, Norra, Svøríki og Litava. Liðið tapti greitt ímóti Ungarn, sum annars vann kappingina. Og liðið kláraði seg minni væl ímóti Italia og Finnlandi, sum vóru tann 7. og 8. dysturin upp á fimm dagar.

Møðin gjørdi sjónliga um seg, tí orkan var ikki til at spæla hesa dystir. Her skal havast í huga, at føroyska liðið vardi 3-2-1 allar dystirnar, og tað krevur eitt sindur meira enn vanlig defensiv verja. Í millumspælinum gav føroyska liðið Norra og Svøríki ein skarpan gang, tí føroyska liðið tapti bara við fýra málum ímóti Norra og tveimum málum ímóti Svøríki.

Ýta av nýggjum
Hetta var fyrstu ferð, at U16 gentuliðið tók lut í altjóða kapping, og tí kunnu vit siga, at liðið var við fyri at læra. Og skulu vit læra av hinum londunum, so má føroyskur hondbóltur helst ýta av nýggjum.

Vit, sum hava vant føroyska U16 gentuliðið, halda, at vit í Føroyum mugu leggja okkum meira eftir venjing, har vit menna tekniska støðið hjá teimum yngru, so at spælararnir hvør sær hava fleiri amboð í ryggsekkinum. Tað hevur somuleiðis týdning, at vit menna spælarar, sum duga at velja frægastu loysnina, tá teir koma í tvístøður á vøllinum. Vit mugu menna spælarar, ið hava ein leysan arm og eitt natúrligt sveiggj í kroppinum, tá bólturin verður sendur avstað. Og harafturat má spælarin vera lættur á fótum. Hæddin hevur ikki so stóran týdning, tí væl skúlaða ungarska liðið smurdi rumensku kempurnar av.

Føroysku spælararnir eru ídnir og raskir, men londini framman fyri okkum hava spælarar, sum eru meira skúlaðir á ymisku plássunum. Leikferðin er høg, og spælararnir duga væl press-spæl, har søkt verður at millumrúmunum í verjuni. Í verjupartinum duga útlendsku liðini, sum eru framman fyri okkum, serstakliga væl at flyta seg og brúka beinini at verja við.

Meira fimleik
Tað er ein góður spurningur, hvussu vit í Føroyum á frægastu hátt klekja okkara ungu hondbóltsspælarar, so at vit menna okkum enn meira. Men ein gongd leið er avgjørt, at vit venja munandi meira agility, so at vit fáa kvikari og kimiligari spælarar.

Sjálvandi skulu vit eisini hava styrkjandi venjingar í fyrstu ungdómsárunum, men fimi og smidleiki mugu ikki svíða fyri styrkini, tí ein hondbóltsspælari hevur tørv á báðum. Ein kimiligur hondbóltsspælari kann altíð styrkja sær kroppin. Ein sterkur hondbóltsspælari hevur tað hinvegin nógv truplari við at fáa ein kimiligan kropp.

Dia Midjord, venjari

Montenegro, Spania, FØROYAR og Paraguei

22. mai 2025

Tað var greitt undan lutakastinum, at Trier í Týsklandi verður heimstaðurin hjá føroyska kvinnulandsliðnum til innleiðandi bólkaspælið í HM-endaspælinum í november/desember. Vertirnir høvdu ynskt at staðseta Føroyar í bólk D, hetta við fjepparum og atgongumerkjasølu fyri eyga. Við lutakastinum í S´Hertogenbosch í dag, gjørdist greitt, at mótstøðuliðini verða Montenegro, Spania og Paraguei.

HM-lutakast hósdagin kl. 17.00

21. mai 2025

Í morgin, hósdagin 22. mai kl. 17.00, verður HM-lutakastið hjá kvinnum. IHF hevur kunngjørt styrkismetingina, og eru Føroyar í triðju røð. Lutakastið kann stroymast her.

6 ungdómslandsdystir móti Íslandi

21. mai 2025

Føroyar hava seinastu árini havt gott samstarv við íslendska hondbóltssambandi um ungdómslandsdystir. Soleiðis er eisini í ár og er talan um gentusíðuna. Fyrst fer U15-landsliðið til Íslands vikuskiftið 31. mai – 1. juni, meðan U17- og U19-kvinnulandsliðini hjá Íslandi koma á vitjan í Føroyum hálvan juni.

Ein loysn frá Sendistovuni