Vinkonur uttanfyri vøllin

Á hondbóltsvøllinum eru góðu vinabondini kanska ikki so sjónlig, men tá dysturin er liðugur, gerst skjótt greitt, at U14 genturnar hjá H71 og VÍF eru væl.

Genturnar úr Vestmanna lúta eitt sindur við høvdinum eftir dystin, tí tær taptu fyri gentunum úr Hoyvík í týdningarmikla dystinum um at sleppa í Faxe Kondi finaluna. Lætta lagið kemur kortini skjótt á tær, tí tær vita, at eitt gott kvøld bíðar teimum saman við vinkonunum úr Hoyvík.

Venjarin hjá VÍF, Fredrik Wollan, og venjarin hjá H71, Ann Ellefsen, hava skipað fyri einum hugnavikuskifi í Vestmanna, har genturnar kunnu stuttleika sær saman.

– Tær hava spælt hondbólt móti hvørjari aðrari í nógv ár og eru vorðnar góðar vinkonur. Ann og eg tosaðu tí saman, um vit ikki áttu at skipa fyri onkrum, har dentur var lagdur á hondbólt, samstundis sum genturnar kundu hava tað stuttligt, greiðir Fredrik Wollan frá.

Eftir dystin var hugni fyri allar pengarnar. Tær ótu eina góða máltíð, og fóru síðan í Staðið, ungdómshúsið í bygdini, har tær spældu ymisk spøl, m.a. var ein kareoke kapping á skránni, har allar vístu síni sangkynstur.

Klokkan var farin væl av midnátt, áðrenn ungu hondbóltsleikararnir blundaðu á gólvinum í Missiónshúsinum. Svøvnurin var tó ikki nógvur. Klokkan sjey varð farið upp at venja hondbólt og endað varð við at spæla dyst við blandaðum liðum. Vikuskiftið endaði við at hyggja eftir dysti millum hvonn-liðini hjá feløgunum.

– Hetta var eitt sera væl eydna vikuskiftið við hondbólti og stuttleika, so tað verður heilt sikkurt gjørt aftur eina aðruferð, sigur Fredrik Wollan.

Sleppa ikki at spæla í Havn ella Klaksvík

15. juli 2018

Tað er ógvuliga ivasamt, um Mikkel Hansen, Landin og aðrar danskar hondbóltsstjørnur koma til Føroya í heyst at spæla móti føroysku landsliðsmonnunum.

Kimiligari hondbóltsspælarar

10. juli 2018

Ein spennandi og lærurík European Open kapping í Gøteborg er liðug, har U16 genturnar endaðu á einum 16. plássi. Kappingin var í døgunum frá 2. til 6. juli 2018.

U16 endaði nummar 16

7. juli 2018

U16 landsliðið við kvinnum endaði á einum sekstanda plássi í European Open, ið hevur verið í Gøteborg í Svøríki síðan mánadagin. 20 lond luttóku.