Mark Lausen-Marcher er settur í starv sum samskipari hjá HSF. Mark kemur serliga at taka sær av ítróttarliga partinum av virkseminum hjá HSF, herundir bæði landsliðsarbeiðinum og breiddarhondbóltinum.
Mark er eitt kent andlit í hondbóltsumhvørvinum í Føroyum, bæði sum fyrrverandi leikari, ungdómsvenjari og ungdómslandsliðsvenjari.
Tað hevur leingi verið eitt ynski hjá starvsnevndini hjá HSF at kunna fara undir eitt meira skipað arbeiði at menna breiddarhondbóltin í Føroyum, harundir í mest møguligan mun at stuðla teimum feløgunum, sum stríðast við at fáa hondbóltin at nørast. Starvsnevndin metir harumframt, at tað er ein fyrimunur, at tað í HSF starvast fleiri fólk, sum hava hondbóltsfakliga vitan og royndir, og sum kunnu ráðgeva starvsnevndini, undirnevndunum og limafeløgunum í HSF í sambandi við, at avgerðir skulu takast viðvíkjandi eitt nú, hvussu kappingarleisturin skal verða í teimum ymisku árgangunum, og hvussu landsliðsarbeiðið hjá HSF skal leggjast til rættis.
Mark L. Marcher hevur drúgvar royndir sum hondbóltsvenjari, umframt at hann, í sínum starvi sum landsliðsvenjari hjá HSF og ungdómsvenjari í Føroyum tey seinastu fimm árini, hevur nomið sær eina sera víðfevnda vitan um limafeløgini í HSF og føroyskan hondbólt sum heild.
Mark L. Marcher er føddur í 1991 og uppvaksin í Høng á Sjællandi. Mark býr í Hoyvík og heldur saman við unnustuni Eydnu Eivindardóttir Danielsen og saman eiga tey eina dóttur og ein son.
