Mynd: EHFHóast eitt 32-29 tap fyri Svøríki, var talan um ein, fyri tað mesta vælleiktan dyst av okkara monnum. Hálvleiksstøðan var 17-15 til Svøríki. Tað sást skjótt í dystinum at talan var um eitt sterk og vælleikandi mótsstøðulið.
Í fyrra hálvleiki fylgdust liðini til støðuna 5-5. So byrjaði Svøríki at draga frá, og við støðuna 17-12 byrjaði at síggja eitt sindur svart út, men okkara menn endaðu hálvleikin væl við trimum málum, og so vóru bert tvey mál á muni í steðginum.
Svøríki hevði leiðsluna fyrsta partin av seinna hálvleiki, men tað eydnaðist føroyska liðnum at javna til 24-24 og til 25-25, men tað eydnaðist ikki føroyska liðnum at leggja seg á odda í seinna hálvleiki.
Svenskarar komu upp á 30-25, men okkara menn stríddust seinastu løtuna og fingu minkað munin niður til trý mál.
Aftaná dystin í dag munnu øll sum hava áhuga fyri svensku hondbóltsdeildini hava fingið við hvør Óli Mittún er. Óli skoraði heili 17 mál upp á 22 málmøguleikar, og var sjálvandi valdur at vera besti leikarin hjá Føroyum.
Hin dystin í bólkinum í dag vann Spania 41-33 á Fraklandi.
Í morgin klokkan 13 spæla Føroyar móti Spania.
Málskjúttar hjá Føroyum:
Óli Mittún 17, Ísak Vedelsbøl 3, Rókur Ziskason 3, Tróndur Johnsson 3, Høgni Heinason 2, Niklas Gaard 1.
