Hondbóltssambandið og byggivirkið Búsetur hava longt sponsorsamstarvið, har fyritøkan verður verandi ein av sjónligu stuðlunum hjá HSF fram til 2026.
Gunn Ellefsen, starvsnevndarforkvinna í HSF, og Sjúrður Holm, stjóri í Búsetri, hittust á skrivstovuni hjá Búsetri á Hjalla, har nýggi sáttmálin varð undirskrivaður. Búsetur verður við hesum verandi ein av sjónligu stuðlunum á øllum pallum HSF´s og á høgru ermu á landsliðsblusuni.
Til sáttmálan viðmerkir Sjúrður Holm,
– Hjá Búsetri eru vit ikki bangin fyri nýggjum, spennandi avbjóðingum. Uppgávan hjá føroyskum hondbólti er eisini stór nú Føroyar skulu til EM, men hesum vilja vit gjarna standa saman um og stuðla. Við gjøllari fyrireiking og nærlagni kunnu vit saman náa góða úrslitinum.
Gunn Ellefsen viðmerkir til sáttmálan,
– Vit eru ógvuliga fegin um, at Búsetur vil taka næstu stigini saman við okkum. Grundarsteinurin undir okkara góðu hondbóltsleikarum í altjóða hondbólti liggur heima í feløgunum í Føroyum. Á sama hátt eru heimligu stuðlarnir eisini ein grundarsteinur skulu vit skapa nøktandi karmar og tryggja menningina.
Sáttmálin er galdandi til og við 2025.
