Komandi vikuskiftið skulu H71-kvinnur aftur í europeiska eldin, tá tær skulu spæla áttandapartsfinalur móti sponsku Atletico Guardés.
Dystirnir verða leygardagin og sunnudagin í spanska býnum A Guarda, báðar dagarnar kl. 18.00, føroyska tíð.
Talan er um sterka mótstøðu og standa sponsku kvinnuliðini seg vanliga væl í europeisku kappingunum. Liðið hevur tveir portugisiskar landsliðsleikarar og hava nærum allir leikararnir spælt ungdómslandsdystir fyri Spania. Atletico Guardés hevur seinastu mongu árini gjørt seg galdandi í toppinum av bestu sponsku deildini og liggur í løtuni nummar 9. Liðið var spanskur meistari í 2017.
Býurin A Guarda liggur í landslutinum Galisia, við vesturstrondina í Spania, tætt við markið til Portugal. Føroyska liðið ferðast hósdagin til Keypmannahavnar og víðari til Porto fríggjadagin, har tær so koyra við bussi yvir um markið til Spania.
