Munurin var trý mál

Føroyar taptu 21-24 fyri Montenegro í næstseinasta dysti í EM-undankappingini. 

Føroysku leikararnir skuldu arbeiða hart fyri at koma framvið stóru montenegrisku verjuni og tað gingu fimm minuttir til Føroyar fingu fyrsta málið. Tað gjørdi tað ikki betur, at longu í 19 minutti fekk Kjartan Johansen sína triðju útvísing og harvið reytt kort.

Í verjuni hildnaðist tó betur, so heldur ikki montenegrar høvdu tað lætt at koma til skot.

Tá farið varð til hálvleiks var støðan 9-11.

Í seinna hálvleiki kom betur glið á føroyska álopsspælið. Áki Egilsnes, ið var skiftur inn á høgra bakk fyri Kjartan Johansen, gekk á odda saman við Jónasi G. Djurhuus.

Føroyar komu tó ongantíð tættari enn tvey mál. Serliga føroysku útvísingarnar kostaðu nógv. Montenegrarnir gjørdu sær dælt av yvirtalsstøðunum, sum endaði við, at skjóti vongurin, Milos Vujovic kundi smekka bóltin í føroyska málið.

Hetta var enn einaferð ein dystur, har føroysku leikararnir prógvaðu, at hondbólts-Føroyar kunnu spæla upp ímóti liðnum, ið vanliga spæla í EM- og HM-endaspølum.

Málskjúttar
Jónas Gunnarson Djurhuus 6 (3)
Rói Berg Hansen 4
Áki Egilsnes 4
Rókur Akralíð 2
Helgi Hildarson Hoydal 2
Allan Norðberg 1
Niklas Selvig 1

 

European Cup hondbóltur í Vestmanna

29. november 2023

Komandi vikuskiftið verða tveir spennandi European Cup dystir í Vestmanna, tá mansliðið hjá VÍF fær vitjan av SSV Brixen úr Italia.

Byggja víðari saman við Búsetri

27. november 2023

Hondbóltssambandið og byggivirkið Búsetur hava longt sponsorsamstarvið, har fyritøkan verður verandi ein av sjónligu stuðlunum hjá HSF fram til 2026.

U20-kvinnur: Tepurt tap fyri vertunum

25. november 2023

Talan gjørdist eisini um tap í fjórða og seinasta HM-undankappingardystinum hjá føroysku U20-kvinnunum. Føroyar taptu 30-28 fyri vertunum úr Serbia, eftir at hálvleiksstøðan var 17-13 til Serbia.