Turið til topplið í Íslandi

Mikudagin gjørdu Turið Arge Samuelsen og Hondbóltsfelagið Haukar á Hafnarfirði avtalu um, at Turið spælir við besta kvinnuliðnum hjá Haukum kappingarárini 2018/19 og 2019/20.

– Eg havi leingið gingið við ætlanini um at royna meg uttanlands, og eftir níggu ár í bestu føroysku deildini, helt eg, at nú skuldi tað verða. Eg vænti at eg hevði angrað tað seinni í lívinum, um eg ongantíð hevði tikið av møguleikanum uttanlands, sigur Turið.

23 ára gamla havnadaman hevur hesa vikuna vant saman við besta kvinnuliðnum hjá Haukum. Venjingarnar eydnaðust sera væl, og støðið er høgt. Tey í íslendska felagnum eru hugtikin av ferðini, neyvu skotunum og kropsligu styrkini hjá Turið.

Haukar er eitt av toppliðunum í íslendsku kvinnudeildini. Liðið var nær við at vinna íslendska meistaraheitið í ár, men endaði fýra stig aftan fyri meistararnar úr Vali, tí Valur vann avgerandi innanhýsis dystin millum liðini ímóti kappingarloki. Haukar hevur hondbóltshøll, har pláss er fyri 2.000 áskoðarum.

Fyri føroyskan hondbólt er avtalan millum Haukar og Turið góð tíðindi. Ein av týðandi tættunum at menna føroyskan hondbólt er, at føroyskir spælarar fara uttanlands at royna seg. Ísland er stór hondbóltstjóð við drúgvum altjóða royndum, og møguleikarnir at mennast har eru góðir.

Venjari hjá Haukum er Elías Már Halldórsson, sum fyri fáum døgum síðan varð kosin hjálparvenjari hjá íslendska kvinnulandsliðnum aftrat venjarastarvinum hjá Haukum.

Íslendska landskappingin byrjar um hálvan september, og kvinnuliðið hjá Haukum fer á venjingarlegu í Spania í august.

Tríggir føroyingar fara at spæla bestu íslendsku kappingini næsta kappingarár. Umframt Turið, skal Allan Norðberg spæla við KA, har eisini Áki Egilsnes spælir.

Montenegro, Spania, FØROYAR og Paraguei

22. mai 2025

Tað var greitt undan lutakastinum, at Trier í Týsklandi verður heimstaðurin hjá føroyska kvinnulandsliðnum til innleiðandi bólkaspælið í HM-endaspælinum í november/desember. Vertirnir høvdu ynskt at staðseta Føroyar í bólk D, hetta við fjepparum og atgongumerkjasølu fyri eyga. Við lutakastinum í S´Hertogenbosch í dag, gjørdist greitt, at mótstøðuliðini verða Montenegro, Spania og Paraguei.

HM-lutakast hósdagin kl. 17.00

21. mai 2025

Í morgin, hósdagin 22. mai kl. 17.00, verður HM-lutakastið hjá kvinnum. IHF hevur kunngjørt styrkismetingina, og eru Føroyar í triðju røð. Lutakastið kann stroymast her.

6 ungdómslandsdystir móti Íslandi

21. mai 2025

Føroyar hava seinastu árini havt gott samstarv við íslendska hondbóltssambandi um ungdómslandsdystir. Soleiðis er eisini í ár og er talan um gentusíðuna. Fyrst fer U15-landsliðið til Íslands vikuskiftið 31. mai – 1. juni, meðan U17- og U19-kvinnulandsliðini hjá Íslandi koma á vitjan í Føroyum hálvan juni.

Ein loysn frá Sendistovuni