U18-menn: Stórur týskur biti

Sum væntað, so var talan um ein torføran dyst hjá U18-monnunum í dag móti Týsklandi, sum vann 32-23, eftir hálvleiksstøðuna 14-10 til Týsklands. Okkara kunnu tó taka nógv jaligt við sær úr dystinum, sum var ein góð trýstroynd undan EM-endaspælinum í august.

Hóast úrslitið vísir nakað av muni, so var munurin ikki so stórur á liðunum í fyrra hálvleiki. Føroyska verjan var ágrýtin og stóð stinn, og hevði Ingi Johannesen eisini fleiri góðar bjargingar í føroyska málinum. Liðini fylgdust fyrstu 20 minuttirnar, men kostaðu nøkur brend skot og tekniskar villur fyri hálvleik, soleiðis at týskarar komu fýra mál fram um. Filip Haldansen, sum stóð seg væl í føroyska álopinum í gjár, var óheppin í dag og fekk harpiksfingrar í eyga heili tvær ferðir og mátti sita uttanfyri størsta partin av dystinum. Í hansara stað kom tó Pauli Rasmussen, sum spæld sín fyrsta landsdysti. Hann stóð seg eisini væl við trimum góðu málum.

Eins og í gjár, byrjaðu Føroyar við einari 5-1 verju í seinna hálvleiki og gav hetta aftur eitt hál, har okkara minkaðu um munin niður í tvey. Rúnar Hammer stríddist aftur í dag væl í føroyska álopinum, og kom hann oftast við fyrsta trýstinum og spældi hann m.a. Magnus Árason fleiri ferðir fríðan á høgra vongi, har hann fekk nógv mál í dag. Stígur kom tó í føroyska spælið eina løtu um miðjan seinna hálvleik og runnu týskarar okkara niður og vóru eftir stutta løtu frammanfyri við tíggju, áðrenn okkara fótaðu sær aftur.

Hóast eitt størri tap, so var hetta ein góð trýstroynd fyri okkara leikarar undan EM-endaspælinum í august, har heili 8 dystir eru á skránni móti sterkastu liðunum í Europa. Í seinna dystinum í Nations Cup í Lübeck møta U18-mennirnir Niðurlondum. Hesin dysturin verður sunnudagin kl. 11.00, føroyska tíð. Dysturin kann stroymast fyri 5.99 euro á her: Start | handball-globe.tv

Dystargongdin Týskland – Føroyar:
5 min. 2-2
10 min. 5-4
15. min. 7-6
20 min. 8-7
25 min. 10-9
30 min. 14-10
35 min. 14-12
40 min. 18-14
45 min. 22-15
50 min. 26-17
55 min. 29-19
60 min. 32-23

Málskjúttar hjá Føroyum:

Magnus Árason 9
Fríði Holm í Innistovu 5 (1)
Pauli Rasmussen 3
Rúnar Hammer 3
Jógvan Andreas Lamhauge 2 (2)
Erling Erlendsson 1

Skrivstovan stongd

22. juli 2024

Hondbóltssambandið er farið í summarferiu, og er skrivstovan stongd næstu tvær vikurnar til og við 4. august. Átrokandi boð kunnu tó sendast til hsf@hsf.fo. Vit síggjast í nýggja kappingarárinum!

Óli Mittún EM-toppskjútti

21. juli 2024

Sum vanligt til slíkar kappingar, so vóru bestu leikararnir heiðraðir eftir U20 EM-endaspælið í Slovenia. Óli Mittún var toppskjútti í kappingini við 76 málum í 8 dystum.

U20-menn: Endaðu nr. 18

20. juli 2024

Eftir ein fínan fyrra hálvleik, har Føroyar vóru frammanfyri 19-17, mistu okkara takið í seinna hálvleiki, og Sveis vann 35-32. Føroyar endaðu við hesum sum nummar 18 av teimum 24 liðunum í EM-endaspælinum.

Ein loysn frá Sendistovuni