U19-menn: Í HM-fjórðingsfinaluni!

Tað var eitt sera hugsavnað føroyskt U19-landslið, sum vant burturúr Saudi Arabia í dag. Føroyar vunnu heili 41-23, eftir hálvleiksstøðuna 22-11. Við hesum eru Føroyar í U19 HM-fjórðingsfinaluni, sum verður leikt hósdagin.

Bæði liðini byrjaðu eitt sindur trilvandi og gjørdu tríggjar tekniskar villur í part fyrstu 5 minuttirnar. Kenslan var tó, at føroyska liðið hevði yvirtakið. Okkara komu fram um og øktu so líðandi um leiðsluna í leypi av hálvleikinum. Føroyska verjan stóð væl, og var tað týðuligt, at næsttoppskjúttin í kappingini á høgra vongi hjá Saudi Arabia ikki skuldi fáa nógv pláss. 15 ára gamli Jákup Egholm vardi hann væl og var Jákup eisini heilt einastandi í álopinum og gjørdi 8 mál uppá 8 royndir av vinstra vongi í fyrra hálvleiki. Góða verjan gjørdi eisini arbeiði lættari hjá føroyska málverjanum, Sasha Lacok, sum stóð væl við 38% í fyrra hálvleiki. Tað tóktist sum um, at Saudi Arabia hugsavnaði seg somikið um at verja fyri Óla Mittún, at teir heilt gloymdu hinar. Ferð eftir ferð stóð Ísak púra fríður á strikuni, Jákup Egholm á vonginum og tríggjar ferðir á rað spaseraði Rókur Ziskason ígjøgnum á høgra bakki. Okkara skoraðu væl uppá kjansirnir og var skoringsprosentið á heili 79. Liðini fóru til hálvleiks við heili 22-11 til Føroyar.

Okkara hildu áfram har teir sleptu í seinna hálvleiki, og eftir 40 minuttir stóð 30-13 og alt var væl og virðiliga avgjørt. Føroysku venjararnir nýttu høvið at fordeila orkuna í mun til komandi dystir, og nakrir leikarar, sum ikki hava spælt so nógv, sluppu at royna seg. Okkara spældu fyri tað mesta 7 móti 6 og riggði hetta væl í mun til at stýra leikferðini í dystinum og ikki skrúva hana ov nógv upp. Trúgvi Hávardsson, sum ikki spældi í gjár, spældi ein fínan dyst í føroyska álopinum, har stýrdi seinastu 20 minuttirnar við góðum mann móti mann spæli og hópin av fríspælingum. Eisini kom Leivur Joensen inn í føroyska málið og stóð hann sera væl við 47%.

Eftir dystin var Jákup Egholm kosin til best leikara í dystinum. Jákup spældi bert fyrra hálvleik, men var heilt framúr í bæði verju og álopi, har hann skeyt 8 mál uppá 8 royndir.

Føroyar eru nú í HM-fjórðingsfinalunum og sostatt í topp 8 í heiminum. Føroyski hópurin skal nú flyta úr strandarbýnum Opatija inn í landið til Varazdin, har endaspælið verður leikt. Føroyar spæla fjórðingsfinalu, antin móti Egyptalandi ella EM-vinnarunum frá í fjør, Spania, hósdagin, antin kl. 12.00 ella 13.30, hetta alt eftir hvør vinnur seinna dystin í bólkinum hjá Føroyum í dag. Vinnur Týskland móti Iran, so vinnur Føroyar bólkin og skulu spæla kl. 11.00. Vinnur Iran, so verða Føroyar nr. 2 og skulu spæla kl. 13.30. Dystirnir kunnu stroymast á youtube hjá IHF, sum eitur IHF Competitions.

Dystargongdin Saudi Arabia – Føroyar:
5 min. 2-3
10 min. 2-6
15 min. 5-10
20 min. 7-14
25 min. 10-18
30 min. 11-22
35 min. 12-25
40 min. 13-30
45 min. 16-30
50 min. 19-34
55 min. 21-38
60. min. 23-41

Málskjúttar hjá Føroyum:
Ísak Vedelsbøl 9
Jákup Egholm 8
Óli Mittún 4(1)
Trúgvi Hávardsson 4
Óla Jákup Gaard Olsen 4
Rókur Ziskason 3
Sofus í Selvindi Nattestad 3
Tóku Fríðriksson 2
Rói Seyer Hjaltason 2
Niklas Gaard 1
Høgni Højsted 1

Málverjar:
Aleksandar Lacok 38%
Leivur Joensen 47%