P/F Wenzel og Hondbóltssamband Føroya hava longt stuðulssamstarvið fyri tvey tey komandi árini, fram til 2028. P/F Wenzel er stórstuðul hjá HSF og verður sjónligt við Mazda og Wenzel á landsliðsklæðunum komandi tvey árini.
Gunn Ellefsen, starvsnevndarforkvinna í HSF, og Rúni Djurhuus, stjóri í P/F Wenzel, hittust herfyri saman við nøkrum av kvinnulandsliðsleikarunum Við Tjarnir, tá Wenzel skipaði fyri stórfingnari 100-ára føðingardagsveitslu, og skrivaðu tey undir nýggja sáttmálan.
- Sjálvsagt vilja vit halda fram, sigur Rúni Djurhuus. Tað hava verið ógloymandi ferðir við landsliðunum uttanlands, bæði í Berlin og Basel. Nú hava vit eisini fingið karmar her heima Við Tjarnir, og er tað eisini ein uppliving hvørja ferð okkara landslið spæla og føroyingar savnast í fullsettari høll.
- Wenzel hevur verið ein sera aktivur stuðul tey seinastu árini. Eitt er fíggjarligur stuðul, men hava tey eisini gingið á odda, tá vit hava samstarvað um tiltøk. Her hava EM-túrarnir í Berlin og Basel verið serliga minniligir, hetta m.a. at takka teimum hjá Wenzel, sum saman við øðrum stóðu fyri fleiri av teimum savnandi tiltøkunum, viðmerkir Gunn Ellefsen.
